กมฺมํ กโรนฺโต อาราเม, สกํ วฑฺฒกิอาทโย;
ปริกฺขารญฺจ สยน-ภณฺฑํ วา ราชวลฺลภาฯ
[294]
เทหีติ ปฏิสาเมตฺวา, วทนฺติ ยทิ ฉนฺทโต;
น กเรยฺย ภยา ฐานํ, คุตฺตํ ทสฺเสตุ วฏฺฏติฯ
[295]
พลกฺกาเรน ปาเตตฺวา, คเตสุ ปฏิสามิตุํ;
ภิกฺขุํ มนุสฺสา สงฺกนฺติ, นฏฺเฐ วตฺถุมฺหิ ตาทิเสฯ
[296]
วิหาราวสถสฺสนฺโต, รตนํ รตฺนสมฺมตํ;
นิกฺขิเปยฺย คเหตฺวาน, มคฺเครญฺเญปิ ตาทิเส;
สามิกานาคมํ ญตฺวา, ปติรูปํ กรียตีติฯ
38. กุลทูสนนิทฺเทโส
ทูสนนฺติ –
[297]
ปุปฺผํ เวฬุํ ผลํ จุณฺณํ, ทนฺตกฏฺฐญฺจ มตฺติกํ;
สงฺคหณตฺถํ ททโต, กุลทูสนทุกฺกฏํฯ
[298]
ถุลฺลจฺจยํ ครุภณฺฑํ, อิสฺสเรเนตฺถ สงฺฆิกํ;
เทนฺตสฺส ทุกฺกฏาทีนิ, เถยฺยา สงฺฆญฺญ สนฺตกํฯ
[299]
กุลสงฺคหา โรเปตุํ, โรปาเปตุญฺจ สพฺพถา;
ผลปุปฺผูปคํ รุกฺขํ, ชคฺคิตุญฺจ น วฏฺฏติฯ
[300]
นิมิตฺโตภาสโต กปฺปโวหารปริยายโต;
อตฺตโน ปริโภคตฺถํ, โรปนาทีนิ ลพฺภเรฯ
[301]
วุตฺตาว เวชฺชิกา ชงฺฆเปสเน คิหิกมฺมสุ;
ฐเปตฺวา ปิตโร ภณฺฑุํ, เวยฺยาวจฺจกรํ สกํฯ
[302]
ทุกฺกฏํ ปทวาเรน, หรเณ ทูตสาสนํ;
สาสนํ อคฺคเหตฺวาปิ, ปฐมํ วทโต ปุนฯ
[303]